Karaj Amikoj,

Por kompensi la senluman grizon de tiu ĉi tago ankoraŭ vintra niaregione, la nova kajero de LG entenas du pecojn indajn nutri rubrikon Ni ridetu. La unua, de Raymond SCHWARTZ : kabareta revuo dekakta Nek ... Nek, ludita en 1937, la jaron de la Universala Ekspozicio en Parizo, do antaŭ pli ol 70 jaroj ; ĝi estis planita por LG de 2007, sed ne plu restis loko. Jean AMOUROUX aldonas artikolon pri la talento de Raymond Schwartz vivigi kabaretojn esperantajn en Parizo. La dua, de Franz-Georg RÖSSLER : pri libreto de CORSETTI, Knedu min sinjorino.
Prilingvaj zorgoj de pluraj kolegoj aperas diversloke ... en Leteroj ... en la kontribuoj de André ALBAULT ... de Trevor STEELE.
Eugene DE ZILAH memoras pri la grekia kataklismo pasintsomera kaj pri ĝiaj psikaj respegulaĵoj.
Ĉi-foje restis loko por recenzoj, kiuj dormis tirkeste de kelka tempo ; dankon al la recenzintoj kaj bonvenon al David KELSO.

Madeleine de ZILAH