Karaj Amikoj,

Tiu-ĉi junia LG iom malfruas pro kialoj nedependaj de ni. Trista novaĵo: nia artikolista teamo perdis fidelan membron: Kurisu Kei mortis en aprilo. Shi Chengtai omaĝe memorigas sian longan fruktodonan amikecon kun li.
Pluraj artikoloj temas pri skandaloj en la nuntempa mondo: tiu de Petro Braŭn, tiu de Julia 'Sigmond, eĉ, pli diskrete, tiu de Sen Rodin.
Meze de la revuo kuŝas la proponoj por OSIEK-premio 2009. Alvenis 78 respondoj, el kiuj nur unu estis nevalida. 55 % de la proponoj iras al 5 aŭtoroj, 4 el ili jam estis favorataj dum la pasintaj jaroj, la kvina estas Mikaelo Bronŝtejn, gratulon al li ! La fina baloto, demokrata kaj sekreta, okazos la 24-an de julio en Kondoros, Hungario.
Aparte dankindaj estas niaj kolegoj kiuj helpas per siaj recenzoj konatiĝi kun la plej freŝaj produktoj de niaj aŭtoroj.
Ne miru, ke vi ne trovos novan LG-kajeron en la leterkesto ĝis fino de oktobro. Nun komenciĝas la somera paŭzo, tamen la libroservo plue funkcios, pli malpli rapide, kiel legemuloj jam spertis !

Madeleine de ZILAH